Кака, нов фудбалски крал

Плејмејкерот на Милан, Кака, очекувано ја доби Златната топка за 2007 година која францускиот магазин "Франс фудбал" му ја доделува на најдобриот фудбалер во светот по избор на новинарите. Во изборот на 96 претставници на "седмата сила", бразилскиот репрезентативец доби 444 бода, 167 повеќе од фудбалерот на Манчестер Јунајтед, Кристијано Роналдо. На третото место се пласираше Лионел Меси од Барселона со 255 бода, додека четврти е Дидие Дрогба од Челзи со 108 и тој е последниот со над 100 бода во овој избор. Другите кандидати добија значително помал број гласови, а најблиску до споменатата "четворка" беше Андреа Пирло со 41.

"Единствен начин да се стигне до ова признание е да се игра во екипа со борци. Затоа им се заблагодарувам на соиграчите од клубот и репрезентацијата како и на тренерите", изјави скромниот Кака, кој со десет гола во Лигата на шампионите практично сам го одведе Милан до титулата во ова натпреварување.

Кака е роден пред 25 години во Бразилија, а освен на Милан, бил член уште на тимот на Сао Паоло. Во Италија е од 2003 година, во репрезентација дебитирал на неполни 20 години и досега има 54 одиграни натпревари за петкратниот светски првак. Има една светска титула од Мундијалот во Јапонија и Јужна Кореја, Куп на конфедерациите со Бразил, еден трофеј на својата земја со Сао Паоло и уште по една од Серија "А", Лигата на шампионите, Супер-купот на Италија и на Европа со Милан. Кака е и најсериозен кандидат за освојување на наградата за најдобар фудбалер во светот според ФИФА.