33.000 долари за манастирот на Тоше

Нашите иселеници во Австралија, преку донаторска акција насловена „За Тоше“, собраа 33.000 австралиски долари за доизградба на манастирскиот комплекс „Св. Преображение“ во Крушево, беше објавено на вчерашната прес-конференција во Клубот на новинарите во Скопје.
„Целата идеја тргна сосема случајно кога во една прилика го посетив манастирот и одлучив да ја активирам мојата пријателска фела во помош за негова доизградба. Испратив многу и-мејлови, а еден од нив стаса и до Австралија, до Ицо Најдовски, кој изрази желба и нашите иселеници да помогнат во изградбата“, истакна Илија Псалтиров, пејач и иницијатор на акцијата.
Псалтиров информираше дека до вчера се собрани вкупно 33.000 австралиски долари, кои ќе бидат донирани за довршување на манастирскиот комплекс „Св. Преображение“ во близината на Крушево.
„Средствата ќе бидат наменети за доработка на фрескоживописот, досредување на конаците и изградба на крст, висок 33 м, во близина на ’Св. Преображение‘, кој беше голема желба на Тоше“, додаде Псалтиров.
„Нема да застанеме тука, Тоше заслужува да му возвратиме за она што го направи за сите нас. Одиме понатаму се' додека не го реализираме неговиот сон и го изградиме манастирот докрај“, додаде Псалтиров.
Донаторската акција продолжува и понатаму, а единствена желба на донаторите е нивните имиња да се најдат во архивата на манастирот.