Титаник потонал поради лошиот материјал од кој бил направен

Во архивата на бродоградилиштето „Херланд и Волф“ во Белфаст, Северна Ирска,каде што бил направен и прекуокеанскиот крузер „РМС Титаник“, најдени се нови податоци, кои според многу експерти даваат точен одговор на речиси едновековно поставуваното прашање: зошто потона „Титаник“, јавија светските агенции.

Во дневниците, градителите оставиле записи во кои се вели дека тие не можеле да најдат доволно квалитетен материјал за неговата градба, па на крајот признаваат дека го направиле од материјали што не се според утврдените стандарди за бродови предвидени за долги патувања. Експертите веќе со децении шпекулираат дека „Титаник“ пребрзо потонал откако удрил во сантата мраз, а претпоставувале дека причината би можела да биде во тоа што градителите користеле челична конструкција со помал квалитет, како и неквалитетни шрафови. Кога првпат биле изнесени ваквите тези, раководството на бродоградилиштето „Херланд и Волф“ ги отфрлиле како неосновани и тврделе дека не постојат детални податоци што би можеле да ги докажат ваквите тврдења.